మొబైల్ ఫోన్లు *కొనుగోలు కోసం కన్నబిడ్డను విక్రయించిన తల్లిదండ్రులు*
Mana Mahati News - తెలంగాణ / Mana mahati news : మొబైల్ ఫోన్లు కొనుగోలు కోసం కన్నబిడ్డను విక్రయించిన తల్లిదండ్రులు మొబైల్ ఫోన్లు ఒక బంగారు గొలుసును కొనుగోలు చేసేందుకు కనికరం లేని తల్లిదండ్రులు తమ కడుపున పుట్టిన బిడ్డను కాసులకు అమ్మేశారు. సభ్యసమాజం తలదించుకునే ఈ ఘటన మహారాష్ట్రలోని ఛత్రపతి శంభాజీనగర్‍లో చోటుచేసుకుంది. ఈ కేసులో సంబంధం ఉన్న ఏడుగురిని పోలీసులు అరెస్టు చేశారు. అలాగే, 550 కిలోమీటర్ల దూరంలోని హైదరాబాద్లో ఉన్న ఆ పసికందును కూడా కాపాడారు. పోలీసుల వివరాల ప్రకారం.. నిందితులైన దంపతులు తమ నెల రోజుల వయసున్న బిడ్డను రూ.1.20 లక్షలకు విక్రయించారు. ఆ డబ్బుతో రెండు ఖరీదైన మొబైల్ ఫోన్లు, ఒక బంగారు గొలుసు కొనుగోలు చేశారు. విలాసవంతమైన జీవితం గడిపేందుకు ఈ దారుణానికి ఒడిగట్టినట్లు పోలీసులు గుర్తించారు. వారు కొనుగోలు చేసిన ఫోన్లు, బంగారు గొలుసును పోలీసులు స్వాధీనం చేసుకున్నారు. ఈ వ్యవహారంలో పసికందు పలు చేతులు మారింది. తల్లిదండ్రుల నుంచి కొనుగోలు చేసిన మధ్యవర్తులు, చిన్నారిని మరికొందరికి ఎక్కువ ధరకు విక్రయించారు. ఇలా పలు దఫాలుగా అమ్మకాలు జరిగినట్లు దర్యాప్తులో తేలింది. చివరకు హైదరాబాద్ లోని ఒక వ్యక్తి వద్దకు చిన్నారి చేరింది. అరెస్టయిన వారిలో పసికందు తల్లిదండ్రులతో పాటు ఈ క్రయవిక్రయాల్లో మధ్యవర్తులుగా వ్యవహరించిన కొందరు వ్యక్తులు, ఒక నకిలీ డాక్టర్ కూడా ఉన్నట్లు పోలీసులు తెలిపారు. ఈ నకిలీ డాక్టర్ పాత్రపై కూడా లోతుగా దర్యాప్తు చేస్తున్నారు. ఈ ఘటనపై సమాచారం అందుకున్న ఛత్రపతి శంభాజీనగర్ పోలీసులు, ప్రత్యేక బృందాలను ఏర్పాటు చేసి దర్యాప్తు చేపట్టారు. సాంకేతిక ఆధారాలతో ఈ క్రయవిక్రయాల గొలుసుకట్టును ఛేదించారు. హైదరాబాద్లో చిన్నారి ఆచూకీని గుర్తించి, స్థానిక పోలీసుల సహాయంతో పసికందును సురక్షితంగా రక్షించారు. ఈ ఘటనపై సంబంధిత సెక్షన్ల కింద కేసు నమోదు చేసి విచారణ కొనసాగిస్తున్నారు. ఈ వ్యవహారంలో ఇంకా ఎవరెవరి ప్రమేయం ఉందనే కోణంలో దర్యాప్తు జరుగుతోందని అధికారులు వివరించారు
Admin
Mana Mahati News
మరిన్ని వార్తలు
Developed By :
